ORMOC PHOTOGRAPHIC SOCIETY (OPS)
by Michael Maglasang
Grupo sa mga professional og mga photography enthusiast gisugdan ug tukod sa dakbayan sa Ormoc. Kining mao nga grupo namugna sa initiatibo ni Engr, Jake Cortes nga usa usab ka professional ug bantog nga photographer. Nagsugod kini sa dihang giimbitar ni Engr. Cortes ang mga mahiligon sa potograpiya nga mag photoshoot uban kaniya sa pag anhi ni Cecilio Abad usa ka fashion designer nga nagpahulagway sa iyang mga obra. Didto unang nagkahimamat ang mga nahimong miembro sa OPS ug sa maong higayon usab na appoint si Engr. Cortes nga OIC sa grupo.
Sa pagkakaron may sobra na sa napulo (10) na ka miembro ang maong grupo walay labot sa mga langyaw nga Ormocanon og dili Ormocanon nga nahiusa usab sa maong grupo pinaagi sa flickr.com, usa ka kumonidad online sa internet.
Atong nahibaloan nga sa pagkatawo sa digital photography midaghan ang mga tawo nga nagmahiligon niini ug dili ikahibulong nga sa dakbayan sa Ormoc mismo daghan pud ang misulod ini nga hilig mao gani nga nahimugso kining Ormoc Photographic Society (OPS). Dako kaayo ang kalipay sa matag miembro nga nahimugso kining maong grupo kay sa niining paagiha sila nakakita ug oportunidad nga makakat-on ug makapaambit sa ilang mga talento og abilidad sa potograpiya. Labot lang sa mga makat-onan, higayon usab kini sa mga photography enthusiast nga mga miembro nga makakuyog sa mga nagkadaiyang photoshoot sama sa mga festivals ug mga simpleng laag pra mabansay ang ilang mga abilidad sa potograpiya.
Ang kasagarang miembro sa OPS nga Ormocanon na aghat niining hilig sa potograpiya tungod sa dili malimod nga kaanindot sa mga talan-awn sa dakbayan, nag una niini ang sunset sa Mt. Magsanga nga makit-an sa Ormoc Bay, ang Lake Danao, ang mga kabaybayunan, og mga kabukiran sa Ormoc nga takos litratuhan tungod sa kaanindot niini. Daghan ang midayeg sa kaanindot sa Ormoc nga makita sa mga litrato sa flickr.com nga gipangbutang sa mga miembro. Ang mga komento sa mga tawo sa tibook Pilipinas og sa tibook kalibutan mahitungod sa kaanindot sa Ormoc mabasa gihapon sa flickr.
Dako ug ikatabang ang grupong OPS sa kinatibok-an sa dakbayan para sa turismo ug para kalambo-an sa Ormoc kay sa ilang paghulagway sa dakbayan og pagpakita niini sa tibuok kalibutan pinaagi sa internet makadani ug mga turista nga mobisita unya niining dakbayan.
[flickrfeed=5|92603857@N00[/flickrfeed]
